KAUKAVU TATALUSOU ANE IOANESI MUKAUKAVU
Vaikala lamana
Uoli voloxu noxou Ioanesi tatalusou 'o ne, tila vile no anu lalotu mukaukavunu mulai noxou tila vile no anu lalotu ualasou lexe Xaiosi. Anu mu'osasou Xaiosi xo anu usu'uline'i ta mitema noxou Lataua laixe. Xe muvikalanu lexe ulaxa'inu laixe noxou itema vile ualasou lexe Diotelepasi.A'alo muai no nano aloxo 'oVaikala lamana 1-4Vaikala sou 'osa'ila muai noxou Xaiosi 5-8Diotelepasi mu'oxonu 'ilixo laixe uasi 9-10Demeteliusi mu'oxonu 'ilixo laixe 11-12Vaikala kaluxusou 13-15
3 John
1 aEni atatila. Eni akaukavunu vaivaikala ane 'o ulai noxine, nini Xaiosi e eni emasaxaine misevile.2Menexilo e eni emasaxaine. Eni alinga ulai noxou Lataua lexe mii ma'ia ane nini na'oxonu la uxali laixesi, mo maulixene uxali laixesi loxo uleeneni muxolu laixe. 3 bTa mitema noxou Lataua se'i mine'e mia'aloxene lexe nini namulimulinu vaikala manina noxou Lataua no anu maulixene, la eni e'osa misevile. 4Xo eni alavusou a'osasi no mine eni alomu lexe ta mitema e imulimulileli ne imulimulinu vaikala manina noxou Lataua.
5Menexilo e eni emasaxaine. Eni alomusou lexe no mine ta mitema sou xaixai noxou Lataua muxali noxine, la nini netoxone'i mo nesu'uline'i laixe. Ia ieni uvaxai'a loxo ane'i ta asila uasi. 6 cAne'i mia'aloi'a ta mitema noxou Lataua no anu mii ma'ia ane nini ne'oxonu noxi'a xo nini tanenixa'a. Nini napalusi'a ta mitema aloxo ne la, la na'oxonu laixe ulai noxi'a kalumo no anu 'ilixo ane Lataua mumasaxau. 7 dAne'i milai sou mia'aloi'a ta mitema e ilavusou Lataua uasi sou Iesu ualasou. Ia ane'i ino'u su'uli vile noxi'a uasi. 8La sou eni avikala pekia'u lexe nenge tamaxa'u alauna noxinge mo su'uli noxinge ulai noxi'a ta mitema aloxo ne. Mo sou nenge nenge'a taxaxaisou vaikala manina noxou Lataua.
9Eni ekaukavu mulai noxinge ta mitema noxou Lataua, ia Diotelepasi anu umasaxa lexe uuli no anu xaixai noxou Lataua. La anu ulomunenge uasi. 10La sou lexe eni ane'e mo aa'alomengixu 'ili'ilixonu. Anu itema sou umunumununenge mo u'oxonu a'alo se'i kalakalavoisinge. Anu u'oxonu aloxo nesi uasi. Anu umaisi'a ta mitema sou xaixai noxou Lataua inene'e, la u'osasi'a mo u'avali'a sou ine'e uasi. Mo anu u'apixa'a ta mitema ane i'osasi'a mo i'avali'a ta mitema sou xaixai noxou Lataua lexe ine'e. Mo ilo'a ixolu ipita uasi, ukusai'a ilai va'axu no 'a lalotu. 11 eMenexilo e amasaxaine. Mamu sou namulinu 'ilixo masua, ia namulinu 'ilixo laixe. 'Ei ane u'oxonu 'ilixo laixe, la anu itema vile noxou Lataua. Ia 'ei ane u'oxonu 'ilixo masua, la anu umaisou Lataua uasi. 12Io, Demeteliusi ne, ta mitema latala mukalusi mivikala laixesou. Xe 'ili'ilixo noxou molu uvikala lexe anu itema laixe. La sou nenge kalumo tavikala laixesou mo nini nelavusou lexe a'alo noxixesou ne manina.
13 fEni vaivaikala tavu'alo lexe akaukavumengixu a uxolu. Ia eni amasaxa lexe akaukavunu no anu su'i uasi. 14Emasaxa lexe alai noxine palea mo nenge taxolu tapita sou tavivikala.
15Vaikala noxilo asenesi. Ia emasaxa lexe opo se'isisi uxolu noxine. Mo ta menexine 'o isovanu aso laixe ulai noxine. Xe nini nasovanu aso laixe kalumo noxilo ulai noxi'a ta menexilo ne vilevilesi.
Copyright information for
ATA